Khwab Mein Khoon Dekhna

Khwab mein khoon dekhna kaisa?

Khwab mein janwar ka khoon maal e haram hai. Jo khwab mein dekhe keh woh khoon mein lut put hai toh woh maal e haram ya a’zeem gunah mein mubtala hai. Agar khwab mein kurta par khoon is tarah se dekhe keh uski asal maloom na hoti ho uski aise maqam par takzeeb hogi keh isay ehsas na hoga.

Neiz insan ka khoon iske us shaitan ki bhi daleel hai jo khoon ki tarah iske jism mein gardish karta hai. Aur woh iske ghar mein dushman ki manind hai.

Khoon ka had se zyada nikalna takleef wa musibat hai. Aur khwab mein zarurat ke waqt khoon ka khurooj rahat wa sukoon aur zawal e gam hai.

Khwab mein haiz ka khoon dekhna

Agar haiz ke dinon mein dekha hai toh iski koi tabeer nahi.

Khwab mein kuwari aurat ka haiz dekhna

Gunahon se bachne wali kuwari aurat ke haq mein khoon e haiz nikah ki daleel hai. Gunahgar aurat ke haq mein haiz ka khoon dekhna haram o badkari ki daleel hai.

Khwab mein hamila aurat ka haiz dekhna

Hamila ke haq mein isqaat, ranj wa gam ki daleel hai.

Aur haiz se na ummeed aurat ke haq mein marz ki alamat hai.

Khwab mein kisi gadhay waghaira mein khoon nazar aana haiza aurat ki daleel hai. Agar gadhay ka sar kisi kapde se bandha huwa dekhe toh yeh haiz ka rukna hai.

Khwab mein khoon dekhne ki tabeer

1. Jo shaks khwab mein dekhe keh woh khoon mein lithda huwa hai toh iske haath se haram maal nikalega.
2. Agar khwab mein apne kurte ko billi ke khoon se mulawwis dekhe toh koi chor lutera iski takzeeb karega. Aur ispar galat ilzam lagayega. Agar khwab mein iska kurta kisi darinde ke khoon se lithra ho toh zalim ghasib badshah ispar ilzam dharega.
3. Aur agar iska kurta dumba aur mendhe ke khoon se mulawwis huwa ho toh taqatwar maaldar shareef aadmi iski taraf galat baat mansoob karega.
4. Aur iske baad isay khoon aur khoon ke jild wa jism par behne ke barabar haram maal hasil hoga. Agar koi gayab ho toh woh apne safar se ba salamat wapis laut aayega. Jo dekhe keh khoon iske jism se nikalta hai aur usne apne badan ke zakham ko dekha hai toh usay jismani sehat, maali taraqqi milegi. Agar koi ghayib ho toh woh salamati ke sath wapas laut aayega. Aur isay khair wa suroor aur khushi hasil hogi.
5. Agar khwab mein dekha keh usne kisi insan ka khoon piya hai toh isay maal wa manfa’at hasil hogi. Aur woh har bala wa fitna wa musibat se nijat payega. Baaz kehte hain keh jo dekhe keh woh khoon ke kuwein mein gir pada hai toh woh haram maal mein mubtala hoga.
6. Jo khwab mein khoon ki waadi dekhe toh wahan iski khoon rezi hogi. Jo dekhe keh uske jism se begair fasad wa zakham aur bila hajamat ke khoon nikla hai toh agar iske paas maal ho toh isi khoon ke ba qadar maal iske haath se nikelega.
7. Agar faqeer hai toh usi qadar maal hasil hoga. Aur khoon apne sahib ki hayat, quwwat aur maal ki daleel hai. Neiz us shaks ki daleel hai jo uski madad karta hai jaise kafeel wa zaamin aur badshah waghaira.
8. Khoon us nutfe ki daleel bhi hai jiske khurooj se woh kamzor hota hai. Kabhi khoon ka peena maal e haram ki daleel hai. Agar khwab mein khoon had se zyada nikla ho toh yeh baat mua’awineen ke taraf se husool nafa ke namumkin hone ki daleel hai jaise walid, aulad aur shaeek mein. Ya maal mein nuqsan hoga. Ya apna koi libas bechega. Ya zauja waghaira se alahdagi ikhtiyar karega.

Khwab mein khoon saaf karna

Khwab mein khoon ko rokne ki koshish karna ya saaf karna is baat ki daleel hai keh musibat wa pareshani se rahat paaye.

Khwab mein khoon ki ulti

Khwab mein khoon ki ulti dekhna beemari, ranj ya gam ki alamat hai. Khwab mein khoon tokhnay ki yeh bhi tabeer hai keh haram maal se bachega. Aur khwab mein sui se khoon nikalta dekhna kisi hasid se takleef pohunchne ki alamat hai.