Khwab mein udne ki tabeer
Khwab mein udna safar hai. Agar udna guddi ke bal ho toh yeh pursukun safar hai. Aur gair musafir ka udna bekari hai. Jo ek chat se dosri chat udkar gaya hai toh woh buland rutba aadmi se dosre buland rutba shaks ki taraf muntaqil hoga.
- Agar aurat apne ghar se kisi aadmi ke ghar udkar gayi hai jise woh pehachanti hai toh woh is aadmi se shadi karegi. Aur jo ek aasnaa ghar se na aasna ghar ki taraf udkar gaya hai toh woh faut hoga kyunkeh woh darul aakhirat hai.
- Agar khwab mein qaidi uda ho toh woh qaid khana se nikalega. Agar gulam dekhe keh woh uda hai toh woh azadi ki nemat payega. Aur baaz kehte hain keh agar khwab mein parwaz paron ke sath ho toh yeh safar ki nishani hai.
- Aur jo khwab mein parinda ke saath udta ho toh woh ghareeb gurba ki sohbat ikhtiyar karta hai. Aur maghroor agar dekhe keh woh udta hai toh uska khwab batil hai.
- Jo khwab mein kisi insan se daud ka muqabla kare aur udkar uspar sabqat legaya ho toh woh ispar ghalib aayega. Aur jo dekhe keh woh pahad ke upar uda hai toh isay sultanat hasil hogi. Aur is saltanat mein bila mushaqqat badshahon par ghalib aayega.
- Aur jo khud ko parwaaz karte dekhe aur woh ahle sultanat hai toh sultanat hasil hogi. Agar udte huwe kisi cheez par gir gaya hai toh us cheez ka malik hoga. Warna deeni khata ka shikaar hoga.
- Jo dekhe keh woh asman ki fiza mein chup gaya hai aur wapas nahi lauta hai toh woh faut hoga. Jo apne ghar se na maloom ghar udkar gaya ho toh woh apne ghar se apni qabar ki taraf jayega. Agar hawa mein parwaz ki hai toh itna beemar hoga keh maut ke kinara par pohunch jayega.
- Aur jo begair paron ke neechi jagah se buland jagah udkar gaya ho, toh yeh husool e khwaish ki daleel hai. Aur jo shaks dekhe keh woh thik seedha udta hai toh iske umoor bila mushaqqat thik honge. Aur jo dekhe keh woh udta hai aur iske do par hain toh yeh har tarah ke insan ke liye khair ki daleel hai. Agar woh gulam ho toh azad hoga. Faqeer hai toh mustaghni hoga. Jo dekhe keh woh apni raghbat aur irada se udta hai toh yeh khair e kaseer ki daleel hai.
- Agar dekhe keh woh udta hai us tarah ghar se bahar jata hai toh yeh uski maut ki daleel hai. Jo dekhe keh woh udne ka irada karta hai magar udne ki taqat nahi horahi. Ya udta hai magar iska sar zameen ki taraf aur paon fiza wa hawa mein hain toh yeh shar e kaseer ke paish aane ki daleel hai. Agar mareez dekhe keh woh udta hai toh yeh iski maut ki daleel hai.
- Aur jo dekhe keh woh Asman wa zameen ke maa bain udta hai toh bakasrat tamanna karta hai. Aur udna talib e ilm ya talib e fisq ki daleel hai. Aur udna badfaali manhusiyat ki daleel hai. Agar paron ke sath parwaaz ki hai toh yeh izzat wa sultanat ke sath safar karne ki daleel hai. Agar begair paron ke parwaz ki hai shaaq safar karega khususan jab ache maqam se parwaz aur buri jagah par utraw ho. Aur agar bure maqam se udan aur ache maqam par utraan ho toh mazkoora tabeer ke bar aqs surat ki daleel wa alaamat hai.
- Agar dekhe keh paro ke begair udraha hai toh alamat hai aisa safar karega jisme mushaqqat zyada aur rahat kam hogi. Agar dekhe keh kisi aala jagah se udkar kisi fuzool jagah gaya hai daleel hai keh khud par zyadati karta hai. Agar buri jagah se udkar kisi achi jagah pohuncha hai masalan khet, masjid waghaira toh tabeer mazkoora bala ke bar aqs hogi.
