Khwab Mein Anghoti Dekhne Ki Tabeer
Khwab mein anghoti hifz wa amaan, sultaan, zauja, aulad aur iske jauhar ke ba-qadar aamaal ki daleel hai. Neiz maal wa baandi ki daleel hai. Jo khwab mein sone ki anghoti dekhe aur iski biwi hamila ho toh ladka janegi. Aur sultaan ke liye anghoti iski badshahat aur iska nageena iske ahkaamaat ka nafaz aur anghoti ke kunda shuda naqsh iske maqasid aur muradein hain.
Khwab mein anghoti tutna
Agar koi shaks dekhe keh uski anghoti ka nageena gir gaya hai toh iska ladka faut hoga ya koi maali fuqdaan hoga. Aur anghoti ka tutna zauja ki talaq par daleel hai. Aur anghoti ghar ya janwar ki kharidari ya wilayat ki daleel hai.
Agar anghoti sone ki thi aur iska nageena bhi hai toh yeh zyada acha hai. Agar anghoti bila nageena ho toh yeh be-nafa aamaal ki daleel hai.
Jo dekhe keh usne lohe ki anghoti peheni hai toh yeh khair par daleel hai jo ise mushaqqat uthane ke baad hasil hogi. Aur haathi daant ki anghoti auraton ke liye qabil e tareef hai. Jo dekhe keh usne chandi ki anghoti peheni hai aur jahan chahta hai ise jaari karta hai toh isay sultanat hasil hogi. Isliye keh Sulaiman a’laihissalam ki min janib e Allah hasil hone wali badshahat unki anghoti mein thi, jo dekhe keh usne khaleefa ki anghoti peheni hai toh isko a’zeem hukumat hasil hogi. Agar woh maali hai aur uska baap zinda hai toh iska baap inteqal karega. Agar iska baap nahi hai toh iska amr khilaaf tamanna ki taraf badal jayega.
Jise khwab mein anghoti mili ho toh a’jam se ya saahib e aulad ladke ki taraf se isko maal pohunchega ya woh neik aurat se shadi karega ya bandi khareedega. Jo apni anghoti ke nageena ko hilta huwa dekhe toh iska u’hda sultanat ma’zooli ke qareeb pohunch gaya hai. Agar dekhe keh uski anghoti utar gayi hai. Agar wali wa hakim hai toh ma’zool hoga ya iski badshahat khatam hogi ya apni biwi ko talaq dega.
Agar yeh khwab aurat dekhe toh yeh iske shohar ki ya iske qareeb aadmi ki wafat par daleel hai. Agar koi insan dekhe keh anghoti ka halqa toot gaya hai aur khatam hogaya hai aur sirf nageena baqi hai toh iski sultanat jaati rahegi. Lekin iska zikr wa hai-at baaqi rahega.
Agar anghoti sone ki hai toh woh mard ke liye zillat hai. Agar woh anghoti sone ki thi toh iski sultanat mein bida’at aajayegi ya woh deeni pareshani aur milki khayanat se dochaar hoga. Apni ria’aya par zulm karega. Agar anghoti tang hai toh musallat aurat se rahat payega ya mushaqqat aamez mumlikat se nijat payega, ya iske gam door honge
